India-Pakistan ramri hung vek dawn : Rajnath Singh

Union Home Minister Rajnath Singh chuan nimin khan Pakistan ramri bul state-a chief minister te chu Jaisalmer, Rajasthan-ah kawmin, security chungchang a sawipui.

Rajnath Singh chuan India leh Pakistan inrina te chu hung vek a nih tur thu sawiin, kum 2018 December thlaah hung zawh hman tum a ni, a ti. Ramri dinhmunte chu ngun taka thlitlai reng a ni dawn tih a sawi bawk.

Indian army-te'n Pakistan ram chhunga surgical strike an neih hnuah ram pahnihte inkar boruak hi a ṭha lo hle. Pakistan ramri bula cheng mi tam tak chu hmun him lamah sawnchhuah an ni tawh bawk.

Home Minister hi khawthlang lama Pakistan ramri bul dinhmunte ennawn turin nimin khan Rajasthan-ah a zin a, ni hnih a cham ang. Rajasthan-a Pakistan ramri, km 1,048-a thuia outpost ṭhenkhatte a tlawh bawk ang.

Ningani khan intelligence agency-te chuan ramri Rajasthan, Delhi, Punjab, Jammu and Kashmir leh Gujarat state-a airport-te chu firfiakten an beih mai a hlauhthawnawm nia sawiin, state sorkar hnenah hian warning a pe a, venhimna khauh zawka kalpui nghal a ni. Civil Aviation Security Bureau pawhin heng state-a police hotute leh airport vengtu te, state leh private airlines-te hnenah fimkhur turin a hriattir bawk. Intelligence agency-te chuan thlasik thlen hmain Line of Control kaltlanga India rama rawn luh ruk tum, Pakistan firfiak 100 dawn an awm niin an sawi.