Murshidabad-a buaina chhuak 'ruahman lawk a ni': CM

West Bengal chief minister Mamata Banerjee chuan nimin, Nilaini khan Murshidabad-a buaina nasa tak chhuak chungchang sawiin,"ruahman lawk vantlang buaina" a nih thu a sawi. Buaina chhuakah Bangladesh mi in inrawlhna an nei a nih chuan sorkar laipui mawhphurhna a nih thu a sawi bawk. West Bengal-ah hian Waqf bill dodalna vangin buaina hi a chhuak a, mi pathumin nunna an chan niin an tarlang.

Banerjee hian Imams leh Muezzins, Kolkata-a punkhawmnaah thu sawiin," Tweet ka hmuh pakhatah home ministry thu laknain Bangladesh mi in hnamhnawih awm anga sawi a ni a, heng thil hi a thleng tak tak a nih chuan sorkar laipui thiam loh a ni. BSF in ramri an veng chunga heng thil a thleng a nih chuan state sorkar ni loin ramri pela buaina chhuakah chuan sorkar laipui thiam loh a ni," a ti.

CM hian union home minister Amit Shah chu beiin, thunun turin prime minister Narendra Modi chu a ngen. Uttar Pradesh CM Yogi Adityanath pawh beiin 'Mahakumbh' laiin mihring engzat in nge nunna chan tiin a kap let bawk. Yogi hian West Bengal buaina chhuak vang hian Banerjee chu pawikhawihtute zalen taka pawi khawih tir angin Thawhlehni khan a lo puh tawh a ni.

Bengal-a rorel lai Trinamool Congress chairperson leh CM ni bawk chuan, tuna duh lohna an lantir Waqf Bill hi an MP te chuan nasa takin Parliament-a an dodal thu leh INDIA bloc, eptu pawl ṭangrual pawhin nasa taka an dodal thu a sawi. Waqf bill chungchanga lungawi lohna lantirna chu Delhi-ah zawk huaihawt ṭha a tih thu sawiin, an party MP te pawhin an rawn thlawp ngei dawn niin a sawi.

Banerjee chuan buaina chhuak avanga thite hnenah hian zangn dawmna Rs nuai 10 pek an nih tur thu a puang. Buaina chhuakah hian mi pathum an thih bakah chenna in eng emaw zatin beih a ni bawk. CM chuan heng chenna in tih chhiatte chu Banglar Bari scheme hmangin sak ṭhatsak an nih tur thu leh dawrkai pawikhawihna tawkte pawh chhawmdawlna pek an nih tur thu a sawi bawk.