Rahul-a'n Brown University tlawh dawn

Congress senior leader leh Lok Sabha-a Leader of Opposition Rahul Gandhi chu Inrinni liam ta khan US-ah a zin a, a cham chhungin Rhode Island-a Brown University tlawhin zirtirtu leh zirlaite nen inkawmna hun an hmang ang.

Rahul Gandhi hian NRI community, office bearer leh Indian Overseas Congress (IOC) member-te a kawm bawk ang. Tun hnaia US a tlawh vawi hnihna niin, nikum September thla khan ni thum chamin a lo zin tawh bawk.

April 15-a Enforcement Directorate (ED) in National Herald case-a chargesheet a thehluhah, Rahul Gandhi leh a nu Sonia Gandhi bakah Congress party hruaitu dang ṭhenkhat chu dik lo taka sum chetvelnaah inhnamhnawihah puh an ni. ED hian BJP hruaitu Subramanian Swany-a'n June 26, 2014-a complaint a thehluh behchhanin hemi chungchang hi kum 2021 aṭang khan a chhui ṭan a ni. Complaint thehluhah hian National Herald newspaper leh web platform ti chhuaktu, Associated Journals Limited (AJL) neih danah thil dik tawk lo awmin he thilah hian Congress hruaitu ṭhenkhat leh Young Indian Private Limited an inhnamhnawih niin a tarlang. Young Indian-ah hian Sonia leh Rahul hian share 38% ve ve neiin, AJL hlut zawng hi Rs vbc 2,000 chuang hu a ni bawk niin ED chuan a tarlang.

Hetih lai hian ED chargsheet-a Rahul leh Sonia te tarlan an ni chu politics lama phuba lak tumna zawk niin Congress party president Mallikarjun Kharge chuan a sawi. AICC session zawh veleh ED hi an rawn che nghal a ni tiin, chargesheet an thehluh avang hian an hlauh phah lo tih a sawi bawk.