SCC-in hna lakna exam-ah Aadhaar hmang dawn

Staff Selection Commission (SSC) chuan hna lakna tur exam hrang hrang an buatsaihah, exam pe te nihna finfiahna atan Aadhaar base verification hman a nih tur thu an puang. Hei hi SCC in May 2025 aṭanga exam an buatsaihah te hman vek a nih tawh tur thu an sawi.

SCC hi central hnuaia hna lakna buaipuitu lian ber niin non-gazetted post, central ministry hnuai leh department hrang hrangte tana hna lakna te chu a buaipui vek ṭhin a ni. Official lam tarlan danin Aadhaar hmang hian SCC exam pe te chuan an nihna diktak an hmang em tih finfiah a ni dawn tih sawiin, nihna lem leh tak hriat ti awlsam tu tur a nih thu an sawi bawk.

Union personnel ministry chuan nikum September 12 khan SSC chu exam a buatsaihah Aadhaar verification hman a lo phalsak tawh a ni. Personnel ministry vek hian nikum August 28 khan Union Public Service Commission (UPSC) hna lakah Aadhaar base verification nei tur hian a hriattir tawh bawk.

SSC leh UPSC ten sorkar hna lakna tur exam an buatsaihah hian mi nuai chuang fe chu ram pumah an inlan ṭhin. UPSC hian nikum khan exam-naa thil dik lo tih awm ṭhin tih bo nan hmel aṭanga in hriat hran theihna leh Artificial Intelligence hmang CCTV surveillance system te chu an lo kalpui tawh a ni.

UPSC hian kumtin major exam ṭum 14 buatsaih ṭhinin heng zingah hian Civil Services Examination hmangin Indian Administrative Service (IAS), Indian Foreign Service (IFS) and Indian Police Service (IPS) officer te an la ṭhin. Hei bakah hian kum tin Group A leh B post interview an kaihruai tel bawk ṭhin.