Mamata-in zirtirtu ban takte an hna thawk chhunzawm turin ti

West Bengal chief minister Mamata Banerjee chuan nimin Thawhlehni khan Supreme Court-in an hna aṭanga a ban tir, zirtirtute chu an hna thawk chhunzawm leh turin a hriattir. Banerjee chuan heng zirtitute hlawh chungchang chu state sorkarin a buaipui sak dawn thu a hriattir nghal bawk. Zirtirtu lungawi lohna lantir mi sang chuang te hi West Bengal School Service Commission (WBSSC) headquarters, Salt Lake-ah nimin thleng khan an la pungkhawm a ni.

Zirtirtu, an hna aṭanga ban takte hi mi 25,700 chuang niin hna lak dan ah thil fel lo awm nia a lan avangin Supreme Court chuan bang turin a hriattir a ni. Heng thil avang hian High Court chuan State Level Selection Test (SLST) 2016-a hna lak dan chungchang chu chhui chiang turin CBI a hriattir tawh bawk.

Mamata Banerjee chuan court thu chhuah chu "dan kalh" a nih thu sawiin, a kaihhruai sorkar chuan Supreme Court thutlukna chu a khinglet dawn thu a sawi. Hetih mek lai hian Leader of Oppositon leh BJP leader ni bawk Suvendu Adhikari chuan thuthlukna chu an pawm thu sawiin,"TMC sorkar chu hlemhletnaah a inrawlh tih ti chiangtu a ni" tiin sorkar a bei zui ve nghal. Calcutta High Court judge hlui Abhijit Gangopadhyay pawhin heng thil thleng vang hian CM chu rang taka a hna aṭanga in hnuk dawk turin a ngen zui nghal a ni.

Chief Minister chuan hna aṭanga ban takte ngenna chu ngaihtuahin, Group C leh Group D staff an hna chan te chu SC-ah thlen vek a nih tur thu sawi langin sorkarah rinna nghat ngam turin a hriattir nghal bawk. Zrtirtu ban takte lamah chuan an ṭang tlat dawn tih a sawi. Banerjee chuan tun hnaia tualchhung buaina chhuahna hmun, Murshidabad chu May thla tirah a tlawh dawn thu a tarlang nghal.