J&K-a democracy tundin nan hruaitu hrente chhuah hmasak a ngai - Farooq Abdullah

Peoples Alliance for Gupkar Declaration (PAGD) hotu Farooq Abdullah chuan Ningani khan Jammu and Kashmir-a democracy tundin a nih theih nan chuan sorkarin hruaitu a hren zawng zawngte a chhuah hmasak a ngai tih a sawi.

Ningani khan Srinagar-ah sorkar laipui leh Gupkar pact hruaitute chuan meeting an nei a, Farooq Abdullah chuan meeting hi a kaihruai a ni. Meeting-ah hian District Development Council (DDC) inthlan result thlir letna neih a ni bawk. 

Abdullah chuan L-G administration leh sorkar laipui chuan J&K-a democracy tundin an tum chuan sorkarin senior leader a hren zawng zawngte hi a ranglama a chhuah zalen vat a ngaih thu meeting-naah hian a sawi chhuak.

Abdullah chuan Peoples Democratic Party president Mehbooba Mufti, minister hlui Naeem Akhtar, legislator hlui Peer Mansoor leh PDP deputy chairman hlui Sartaj Madani-te chu sorkar laipuiin a la hren mek thu a sawi. 

"Prime Minister Narendra Modi chuan rampumah 5-G hman chhoh dan a sawi tawh laiin, J&K ah chuan 4-G internet service tihtawp a ni thung. Sorkar chu a rang lama 4-G internet service hi J&K ah hian pechhuak leh vat turin ka ngen a ni," tiin Abdullah chuan meeting neihnaah hian a sawi bawk. 

Abdullah bakah hian Gupkar alliance thupuangtu leh Peoples Conference (PC) chairman Sajad Lone chuan sorkar chu a mi hren mekte chhuah tura an phut thu a sawi bawk a ni.