OTT, social media-a mipat hmeichhiatna lam khap tura ngenna ngaihtuah dawn

Supreme Court chuan sorkar laipui hnena social media platform leh OTT kaltlanga pek chhuah ṭhin mipat hmeichhiatna lam rawng kai tarlan ṭhin khuahkhirhna tur atana kaihhruaina leh dan mumal tak siam tura ngenna thlen chu vawiin Thawhṭanni hian a ngaihtuah dawn. He ngenna thlentu hian National Content Control Authority chu kahhruaina dan mumal siam turin a ngen nghal bawk.

Ngenna thlente hi Justice BR Gavai leh Agustine George Masih te ṭhutna bench-ah ngaihtuah a nih tur thu sawiin,Supreme Court chuan ngenna thlentu lam pawh hi court-a in lan ve turin a hriattir nghal bawk.

Ngenna thlentuin a tarlan danin social media site hrang hrang leh OTT platform-ah mipat hmeichhiatna lam rawng kai hrang hrangte chu tarlan ṭhin a nih thu leh, khuahkhirh a nih loh chuan vantlang zinga thil ṭha lo zawk a thlen thei dawn niin a sawi.

SC-a ngenna thlen tu hian ṭum tam tak chu thuneitu leh hma la theitu hnenah a lo thlen tawh thu sawiin, mahse a thil thlente hian awmzia an nei thui lo hle niin an tarlang. Hei mai bakah OTT bakah social media-a hetiang lam zalen taka tarlan hi kum tling lo leh naupang zawkte tan a ṭhat loh thu a sawi lang bawk.

Rehabilitation Council of India pawmpuinain hetiang lam a hmala thei tur mi thiam bikte telna committee chu din rawt niin, mipat hmeichhiatna lam hawi en nasat hian rampuma vantlang leh mimalah nghawng a neih nasat dan te zirchiang a, report kimchang thehlut turin a ngen zui nghal.