Jharkhand mi hnathawktu 5 Niger-ah ruk bo an ni

Jharkhand state mi leh sa panga, Niger rama hna thawka awmte chu an thawhna hmun Kalpataru Power Transmission Limited Company aṭangin ruk bo an nih thu report a ni. Heng mite hi kum 2024 khan Niger-a hna thawk tura hruai an ni. Rukbo an nih hun hi Zirtawpni liam ta kha niin an tarlang.

Ruk bo nia an sawite hi Giridih district, Bagodar police station huamchhunga awm an ni. Hnathawktu dang chuan tualchhung mi tu tih hriat lohte chu an camp-ah hian rawn kalin anmahni veng tura an dahte an thah hnuah silaia vauin heng mi panga te hi an hruai bo ta niin an tarlang.

Hnathawkte chungchang buaipuitu, social activist Sikandar Ali chuan ruk bo takte hi an vaiin Kalpataru Power Transmission Limited Company-ah hian an thawk vek niin a sawi. Sorkar laipui hnenah he thil thlengg chungchang hi ngaihven a, ruk bote hi chhan chhuah a nih thuai theihna atana rang taka hma la turin a ngen bawk.

Jharkhand mi leh sate ruk bo an nih chungchang hi chief minister Hemant Soren beng a thlen hnuah, CM hian external affairs minister S Jaishankar hnenah hma lak pui turin a ngen zui nghal a ni.