Prime Minister-in Bihar a tlawh nawn leh dawn

Prime minister Narendra Modi chuan assembly inthlan hmabak, Bihar chu May 4 hian a tlawh nawn leh dawn. Hei hi ni 10 chhunga a tlawh ṭum hnihna tur a ni. State khawpui, Patna-a Patlipura Complex-ah 'Khelo India Youth Games 2025' a hawng dawn a ni.

Bihar hian he infiamna kutpui hi a thlen vawi khatna tur a ni a, theihtawpa inpuahchahin Pathianni khan chief minister Nitish Kumar hoin an inbuatsaih dante an thlir ho a ni. CM Kumar hian PM Modi-a'n April 24-a an state a tlawh ṭum khan Khelo India Youth Games hawng tur hian a sawm a ni. PM hi ni khat cham chauhin a kal dawn a, state chhunga hmasawnna hna thawhna tur project eng emaw zat a hawng nghal bawk ang.

Bihar Deputy Chief Minister Samrat Choudhary chuan infiamna kutpui hi May 4-15 chhung neih a ni dawn tih sawiin, Patna bakah district hrang hrangah in elna hi neih a ni dawn a ni.

Kumin October/November velah Bihar assembly inthlan hi neih a ni dawn a, hei vang hian BJP chuan ṭan a la chho nasa tawh hle. Kum 2020 inthlanah khan BJP leh JD(U) an thawkdun a, mahse party mala seat la hnem ber chu Rashtriya Janata Dal (RJD) a ni thung.