PM Modi-a'n WAVES summit a hawng

Prime minister Narendra Modi chuan nimina Maharashtra khawpui, Mumbai-ah World Audio Visual and Entertainment Summit (WAVES) summit a hawng. He hunah hian film industry lama mi lar tak takte bakah content creator-te an tel a ni.

Prime Minister chuan India rama content siam hrang hrang te, content creator-ten economy lama hmasawnna an thlen theih dan turte a sawi. WAVES award pawh la siam chhoh a tiam bawk.

Prime Minister Office chuan WAVES 2025 chu India ramah hetiang lam chi neih a nih vawi khatna a nih thu tarlangin, summit-ah hian sector hrang hrang - broadcasting, infotainment, AVGC-DR, film leh digital media chungchangah plenary session 42, breakout sesion 39 leh masterclass 32 neih a ni ang.

WAVES 2025 hi ni li chhung awh tur a tih niin he hunah hian India mai bakah ram hrang hrang 90 aṭangin aiawh an rawn tel a ni. Summit hi kumtina hman tura tih niin Mumbai-ah February apianga hman chhunzawm tum a ni. WAVES kaltlang hian kum 2029 hmain USD tld 50 hmuh chhuah hman tum a ni a, local entertainment economy-a India hnuhma ti lang thei tur a nih beisei a ni bawk.

PM hian WAVES 2025 a hman zawh hnuah Andhra Pradesh leh Kerala-ah hmasawnna hna thawhna tur project hrang hrang a hawng nghal ang. Kerala ah hian vawiin Zirtawpni hian Vizhinjam International Deepwater Multipurpose Seaport, Rs vbc 8,900 hu thawhna tur a hawng dawn a ni. Andhra Pradesh-a Amaravati-ah hmasawnna thlen tur project thawhna tur lungphum a phum nghal dawn bawk. He project thawhna tur atan hian Rs vbc 58,000 hu sum ruahman a ni.