NCW report-ah chhungte laka hmeichhe kutthlakna complaint tam ber

National Commission for Women (NCW) chuan kumin chhunga India rampuma complaint an dawn tawh zat chu 7,698 a tlin tawh thu tarlangin, complaint theh luh zingah hian mahni in chhung khura hmeichhiate kut thlakna, domestice violence vanga report theh luh tam berin report lut zawng zawng aṭanga 1,594 a tling pha.

Domestice violence tih hi mahni laina leh chhungte lak aṭanga kut tuar tihna a ni. January thla chhung khan thubuai 367 awmin, February-ah 390, March-ah 513, April-ah 322 leh May thla chhung ringawt pawhin vawi hnih thubuai ziah luh a ni leh hman bawk. Heng bakah hian in rikrapna leh in vauna thleng te vangin thla thum chhungin thubuai 989 a awm hman bakah thubuai ziah luh tam ber pathumna chu kut in thlak vang niin ṭum 950 thubuai ziah luh a ni tawh bawk.

Inneih thilchhawm hmanga in vauna thleng vangin thubuai 916 a awm a, pawngsual leh pawngsual tumna thleng thubuai 394 leh mipat hmeichhiatna ti bawrhbang zawnga in tih buaina chhuak vangin thubuai 310 a awm bawk. Cyber crime-ah hmeichhia tih buaina thleng vangin thubuai 110 ziah luh a ni tawh a ni. Official lam chuan heng thubuai ziah luh tamna chhan hmeichhia zinga inzirtirna neih ṭhat vang niin an tarlang.

India state zingah Uttar Pradesh chu thubuai ziah luh tamna ber niin thubuai 3,921 ziah luh niin, rampuma thubuai ziah luh zawng zawng aṭanga 50% aiin a tam. Delhi chuan dawtin thubuai 688 theh luh a ni ve bawk, Maharashtra chuan thubuai 473 ziah luh an nei. Madhya Pradesh, Bihar, leh Haryana, aṭangin thubuai 351, 342, leh 306 te ziah luh a ni bawk.