WAVES chhungin Rs vbc 1,000 hu inremna nei tawh

Mumbai-a hman mek World Audio Visual and Entertainment Summit (WAVES 2025) ah khawvel hmun hrang hrang aṭanga chhimtu lo kal khawmin summit kaltlanga inremna hrang hrang neihte a ni thum ni thleng khan Rs vbc 1,000 hu neih a nih tawh thu Ministry of Information & Broadcasting Secretary Sanjay Jaju chuan a sawi.

WAVES 2025 hi a vawi khatna niin, kum dangah pawh kumtin February thla apianga hman tum a ni. Kumin summit-ah hian ram 22 aṭangin aiawh eng emaw zat an rawn tel. Ram lian rawn tel zingah hian United States, Japan, Germany, South Korea, Russia, leh New Zealand aiawh an tel. Entertainment huanga lian tak tak Netflix, Amazon Prime Video, Meta, Disney Star, Zee Entertainment, Banijay Asia, Warner Bros. Discovery, Sony LIV, YRF, Dharma Productions, Jio Studios bakah Rotterdam Film Festival leh Rushlake Media aiawh an rawn tel a ni.

Summit-a in remna hrang hrang neih puanzar tawh zingah Indo-European Animation Alliance inkara India-a Broadvision Perspectives leh Europe-a Fabrique d’Images Group te inremna ziah, Euro mtd 30 chu a tam ber a la ni. Summit neih chhunga thawh dunna tur inremna neih hlut zawng hi Rs vbc 1,000 ai hian a la tam belh rin a ni bawk.