India-in buh chi tih danglam, thar chhuah ti pung thei tur siam chhuak

Union agriculture and farmers welfare Minister Shivraj Singh Chouhan chuan buh chi hnih tih danglam 'genome-editing', buh thar ti tam thei tur chu India in a siam thu a puang. He buh chi tih danglam hian buh thar emaw thlai thar emaw chu 30% laiin a tih pun theih tur thu a puang. Hetih lai hian India-ah gene tih danglam chu phal la ni chiah loh a nih bakah dan hnuaia ennawn mek a la ni thung.

Expert-te tarlan danin heng buh chi hnih tih danglam hi Kamala leh Pusa DST Rice 1 tih hming vuah niin, India thlai thar chhuah ṭhin chu 20% emaw 30% emaw thleng a tih pun theih beisei a ni. Heng buh gene tih danglamte hi khawkheng pawh tuar thei tur leh, thar rang tak tur a nih bakah methane pek chhuah leh nitrogen mamawh pawh buh dang aiin a tlem zawk a ni.

India agriculture hnuaia thlai chi gene tih danglamna hi Supreme Court kaihhruaina hnuaiah kum 20 chuang enchhin tawh a ni. Heng buh chi tih danglam te hi ramchhungah phalna nei lo leh a him tawk em tih enchhinna paltlang loin tih danglam phal a ni em tih zawhna chu minister Chouhan chuan heng thlai chi tih danglamte hian tun aṭanga kum 4 - 5 hnuah chauh loneitute hnen a thlen theih beisei a nih thu a tarlang bawk.

Chouhan chuan heng thlai chi ten loneitute kut a thlen hnuah chuan lo neihna tur hmunte chu hectare mtd 5 a tih tlem a nih bakah, thlai tharte chuan ton mtd 10 a tling pha dawn tawh niin a sawi. Indian Council of Agricultural Research(ICAR) hian thlai chi tih danglamna project hi kalpuiin horticulture thlai, ramsa, sangha leh microbes te lakah a lo kal pui tawh ṭhin a ni.