Mayawati-i’n Hindu ram siam tumah BJP a puh

Uttar Pradesh-a eptu pawl, Bahujan Samaj Pawrty (BSP) hruaitu Mayawati-i chuan nimin khan Lucknow-a Kanshiram Park-a rally huaihawtah thu sawiin, BJP chuan India chu Hindu ramah siam a tum a ni, a ti.

Mayawati-i chuan Prime Minister Narendra Modi-a chu na taka beiin, ìKum 2014 Lok Sabha inthlanpui neih dawna a campaign-naah, PM Naraendra Modi-a chuan retheihna um bo te, thil man sang zel khuahkhirh te, zirna, hna thawh tur, electricity leh water supply chungchangah mipuite thil tam tak min tiam a, mahse a thutiam hi engmah a la tipuitling lo. Narendra Modi-a sorkar hian Uttar Pradesh mipuite chu thutiam tihhlawhtlin leh si lo chauh a pe a niî a ti.

BJP chuan India chu Hindu rama siam tumin theihtawp a chhuah a, UP-ah pawh sakhaw inkarah buaina nasa tak a chawk chhuak a ni. ìDalit mite chunga pawikhawihna a hluar a, ramchhung hmun hrang hrangah bawng humhalhtu tih hmingchhalin Muslim leh sakhaw tlem zawkte chu beih an ni fo bawkî tiin tiin Mayawati chuan a sawi.

Uttar Pradesh hian nakkum kumtir lamah assembly inthlan a hmachhawn dawn a, Mayawati-i chuan BSP chuan sorkar a siam leh ngei a beisei thu a sawi. An party-in sorkar a siam hunah chuan state chhungah dan leh thupek dinhmun a ṭha zawk dawn a, hmeichhiate himna chu an ngaih pawimawh ber tur thu a sawi.

Nimina BSP rally-naah hian mipui pungkhawm innek buai vangin mi pahnih an thi a, mi dang 15 velin hliam an tuar. Naupang eng emaw zat chu chin hriat lohin an awm nia sawi a ni bawk. Hliam tuarte hi damdawi-inah kalpui nghal an ni. Mahse BSP state president Ramachal Rajbhar chuan innekbuai vanga thi ni loin, khaw lum lutuk vanga thi niin a sawi thung. Rally-ah hian mi nuai 10 vel an tel nia sawi a ni.