Firfiakten Kashmir-ah sorkar building bei

Jammu and Kashmir-a Pampore district-a sorkar buil≠ding pakhat chu nimin zing khan firfiakten an bei a, security force-te nen inkap zuiin sipai pakhatin hliam a tuar.

Police-te chuan firfiakte hi eng zat chiah nge an nih hriat a ni lo tih an sawi a, Srinagar khaw daia Entrepreneurship Development Institute (EDI ) campus chhungah an tawm niin an sawi. Firfiakte hian zing dar 6.30 vel khan building bulah hian security force-te bum nan kangmei an ti chhuak a, hemi hnu hian EDI building chhungah an tlan lut a ni.

Security force-te chuan building hi an hual nghal a, tlanchhuah theihna tur awmte pawh an dang nghal vek a ni. Kangṭhelhtute pawh koh nghal ni mah se, venthawn thilah building chhungah hian an luh phalsak an ni lo.

Kumin February thla khan EDI campus-ah vek hian firfiak leh security force-te chu darkar 48 zet an lo inkap tawh bawk. Hemi ṭum hian civil mi pakhat, paramilitary commando pathum bakah firfiak pathum an thi a ni. EDI complex hi Sringar-Jammu national highway bul, Sringar
aṭanga km 10-a hla-a awm a ni.