Railways-in Rs vbch 1,656 a dawng

Railways chuan ramchhunga rel station hrang hranga CCTV dahna tur leh, rel-a bio-toilet siamna turin sorkar laipui aṭangin cheng vaibelchhe 1,656 a dawng.

Cheng vaibelchhe 1,155 chu ramchhunga faina beihpui thlakna kal zelah, Swachh Bharat Mission hnuaiah bio-toilet siamna atana pek a ni. Khualzinte himna turin station liana CCTV dahna turin Nirbhaya Fund aṭangin cheng vaibelchhe 500 a dawng bawk.

Railway Board Chairman AK Mital chuan an sum dawn chuan faina lamah hmasawnna a thlen dawn bakah, bio-toilet hman chuan rel kawng tuiek chak leh chhe chak tak pawh a veng thei dawn a ni, a ti.

Sorkar kum kal lai mekah bio-toilet hi 40,000 dah a ni tawh a, 30,000 dang dah belh hman an tum tih Mital chuan a sawi a, rel thar tlantir tur Tejas leh Humasafar-ah te pawh bio-toilet dah vek an ni ang. Hei bakah hian rel kawng a thianghlim leh tlo zawkna ata rel-a toilet hman mekte chu bio-toilet hmanga thlak vek tum a ni.

Rel station-a CCTV dahna tura an sum dawn hmang hian station 1,000 velah CCTV hi an dah thei dawn niin Mital chuan a sawi. Hei hian khualzinte, a bikin hmeichhiate himna atana thil pawimawh tak a ni, a ti. Railways hian station 100 velah CCTV system hi a hmang mek a ni.