Surgical strike video footage tichhuak dawn lo

Indian Army-te'n Pakistan ram chhunga surgical strike an neih chungchangah inhnialna tam tak awm mah se, September 30-a sipaite chet dan video hi mipui hmuh theih tura tlangzarh a ni dawn lo niin official pakhat chuan a sawi.

Pakistan chuan India sipaiten surgical strike an neih thu an sawi hi thu dik lo niin a sawi a, hei vang hian ramchhunga politician ṭhenkhatte chuan a finfiahna hi tlangzarh turin sorkar an phut a ni.

Mahse sorkar official pawimawh tak pakhat chuan video footage tihchhuah a nih chuan, ram pahnihte inkar boruak a tichhe lehzual dawn a, indona thleng a nghawng chhuah a hlauhawm tih a sawi.

India chuan September 18-a Pakistan firfiakten Uri sector-a army camp an neih hnuah, ni 10 chhung chu Pakistan-a surgical strike neih dan tur chungchang hi a buaipui a, ram hruaitute hnen aṭanga remtihpuina an hmuh hnuah September 29 zanlai khan strike hi neih a ni ta a ni.

Surgical strike neih hnu hian India leh Pakistan inkar boruak hi a la ṭang hle a, sorkar laipui chuan ramchhunga ralthuam siamtu leh contractor-te chu hmanhmawh thila ralthuam tam zawk siamchhuak thei tura inbuatsaih turin a hrilh. Kumin kumtira Pathankot air base beih a nih hnu pawh khan sorkar chuan ralthuam siamtute chu hetiang bawk hian a lo hriattir tawh bawk a ni.

Hetih lai hian Pakistan chuan surgical strike neih a nih hnu hian firfiak pawl, LeT hotu Hafiz Saeed leh Hizb-ul-Mujahideen hotu Sayeed Salahuddin-te chu hmun him lamah, Pakistan sipaite venhimna hnuaiah a dah nghal nia sawi a ni. Firfiak pawl hotu hi Pakis≠tan Army Special Forces commando-te chuan thawmhnaw pangngai inbelin an veng a, firfiakte tawmbuk LoC bul 600m -1.5 km vela awm ṭhin pawh an ram LoC aṭanga km 7-8-a hlaah an sawn nia sawi a ni bawk.