Ramchhung Larkhawm

Dengue leng vangin doctor-te chawlh lak remti lo

Uttar Pradesh sorkar chuan an state-a dengue hri leng mek avangin doctor leh municipal hnuaia thawkte chu chawlh lak a remti lo. UP-ah hian dengue vanga thi hi mi 200 an tling tawh nia sawi a ni.

Chief Secretary Rahul Bhatngar chuan sorkar damdawi-in tinah fever health desk siam turin a ti a, he hmunah hian ngawrh taka duty-in mipuite chu inenkawl dante hrilhin, damlote pawh a thlawnin enkawl an ni ang. CS chuan dengue vei hmuhte awmna bial hrang hrangte chu thosi piang thar tur venna atana anti-larva spray chu kar khatah vawi 3-4 phuh ṭhin turin a tibawk.

Delhi-ah One Stop Centre siam dawn

Delhi Commission for Women (DCW) hotu Swati Maliwal-i chuan hmeichhe harsatna tawkte
ṭanpuina turin Delhi khawpui chhungah 'One Stop Centre' eng emaw zat din a ni dawn tih a sawi.

Maliwal-i chuan centre hi 11 tal hawn an tum tih sawiin, heng hunah hian pawngsual leh mawi lo taka khawih tawk tawh, thuam chhawm chungchang avanga tinawmnah tawk leh, harsatna dang nei hmeichhiate chu theih anga ṭanpui ṭhin an ni ang, a ti. Center hi DCW in a enkawl dawn a, sorkar laipui aṭangin sum pek an ni dawn tih a sawi. August thlaa Delhi Chief Minister Arvind Kejirwal leh Union Minister for Women and Child Development Maneka Gandhi-te'n meeting an neih khan One Stop Centre din hi an lo rel tawh a ni.

Jaya-i dinhmun a tha

September 22 aṭanga Chennai-a Apollo damdawi-ina enkawl, Tamil Nadu Chief Minister Jayalalithaa-i dinhmun chu a ṭha zel niin rorellai, AIADMK chuan an sawi. CM dinhmun chungchangah thu dik lo thehdarh tawh lo turin an ngen nghal bawk.

Jaya-i hriselna dinhmun hi an puanzar duh loh avangin thu thang a tam hman hle a, a thi nia thu thehdarhte pawh an awm. Hei vang hian eptut chuan thu dik tak puang turin rorellai party an phut a, Jaya-i thlalak emaw, a video emaw tichhuak turin court-ah an phut hial a, mahse an thil phut hi court chuan a hnawlsak a ni.