DMK-in TN tan CM thar dah a phût

Tamil Nadu Chief Minister Jayalalithaa-i chu Chennai-a Apollo Hospital-ah enkawl mek a ni a, khawl hmanga thawk tir a la ngai nia sawi a ni. Hetih lai hian eptu party, DMK chuan sorkar rorelna mumal a awm theih nan chief minister thar an ph˚t.

DMK treasurer MK Stalin chuan rorelna ṭha taka a kal chhunzawm theih nan CM in-charge emaw, CM thar emaw dah a ngai tih a sawi a, mahse a rawtna hi eptu pawl dang bakah DMK thawhpui Congress party pawhin an thlawp lo.

Tamil Nadu Assembly-a eptu hruaitu MK Stalin chuan, "CM Jayalalithaa-i hi damdawi-ina dah luh a nih khan ni reiloteah a chhuak leh thei mai dawn nia sawi a ni. Mahse tunah chuan hun rei zawk enkawl ngai nia sawi a nih leh a, hetihlai hian state chuan dinhmun khirh tak tak a hma≠chhawn mek a, Cauvery lui tui chungchangah buaina pawh kan tawk mek a ni", a ti. Hei vang hian sorkar rorelna hna chu tluang taka a kal chhoh theih nan chief minister thar dah a nih loh pawhin, chief minister in-charge tal dah a ngai a ni, a ti. Hei hi AIADMK kaihhruai sorkar pawhin a tih tur a nih thu a sawi bawk.

CM Jaya-i hi damdawi-ina hun eng emaw chen enkawl a nih hnuah sorkar lamin a dinhmun a puanzar mai loh avangin thu thang dik lo a leng nasa hman hle a, report ṭhenkhat chuan a thi tawh ang hialten an sawi a ni. CM hriselna dinhmun chungchanga thu dik lo thehdarh vang hian thubuai 40 dawn ziahluh a ni a, nimin khan Chennai-ah report dik lo siamtu mi pahnih chu man an ni.

September 22 khan Jaya-i hi Apollo hospital-ah dah a ni a, amah tlawh tumtu VIP eng emaw zat chu an hmuh phalsak an nih loh avangin mipui ngaihven a hlawh phah hle. Mahse thu thang a tam tak hnuah an party chuan CM hian hma a sawn zel thu an sawi ta a ni. Kum 68 mi, Jaya-i hi dehydration leh khawsik sang vanga enkawl mek nia sawi a ni a, amah enkawltu team-ah hian UK specialist leh Delhi AIIMS hospital-a expert pathum pawh an tel a ni.