Mandela Foundation tan Rs mtd 9.3 hlan

Sorkar laipui chuan South Africa mipuite ṭanpui hna thawktu, Nelson Mandela Foundation hnenah a hnathawhna kawnga puihna atan cheng maktaduai 9.3 a hlan.

Johannesburg-a Indian High Commissioner Ruchi Ghanashyam chuan foundation tana ṭanpuina an pek chu tunhnaia Prime Minister Narendra Modi-an South Africa ram a tlawh rah a ni, a ti.

Ghanashyam chuan, "Foundation-in kum eng emaw zat mipuite tana rawngbawl hna ṭha taka a thawh dan te a hmuhin, PM Modi chuan foundation ṭanpuina tura sum pek hi a ngaihtuah ta a ni", a ti.

Kum 1999 khan South Africa president aṭanga a chawlh hnuah, Nelson Mandela Foundation hi din a ni. Foundation hmun sakna tur atan pawh hian India sorkar chuan a lo pui tawh bawk. An building-ah hian India-in kum 1990-a President Mandela hnena civil mite hnena chawimawina sang a pek, Bharat Ratna bakah Gandhi Peace Prize a pekte pawh dah a ni.