Motor chetsualna thleng tuartute cashless treatment scheme hmang ṭan

Ministry of Road Transport and Highways-in hriattirna a tih chhuahah, kawngpuia motor chetsualna thleng tuartute pawisa chawi ngai lo enkawlna, Cashless Treatment of Road Accident Victims Scheme, 2025 chu May 5, 2025 aṭang khan hman ṭan a ni.

He scheme hnuaiah hian road accident tuartu hian sum chawi ngai loa enkawlna hi Rs nuai 1.5 thleng a dawng thei a ni. Ministry thuchhuah chuan kawngpuia motor chetsualna, eng kawng pawh ni se a tuartu chuan cashless treatment hi a dawng thei a ni, a ti. National Health Authority (NHA) chuan he programme hi kalpuiin police, hospital, state health agency leh a kaihhnawih dangten an thawhpui ang. State Road Safety Council chu nodal agency a ni ang.

Hriattirna tih chhuahah hian motor accident tuarte hian hospital thlan chhuahah, chetsualna thlen aṭanga ni sarih chhungin cashless treatment hi Rs nuai 1.5 thleng a dawng thei a ni. Scheme kalpui a nih dan chungchang thlithlai turin sorkar laipui chuan steering committee a din dawn bawk a ni.