May 3 thleng lockdown pawhsei a ni April 20 aṭangin khuahkhirhna ṭhenkhat thlahdul ang
Prime minister Narendra Modi chuan nimin chawhma dar 10 khan TV kaltlangin ram mipuite hnenah thuchah a sawi a, nimina tawp tur rampuma kharkhipna, lockdown hman mek chu May 3 thleng atan pawhsei a nih thu a puang.
Narendra Modi chuan economic angle aṭanga thlir chuan ni 21 chhung lockdown hman chu an tuar nasa tawh hle tih a sawi a, "Mahse India ram mipuite nunna hi a hlu zawk daih a ni," tiin hri leng laka mipuite himna turin lockdown hi hman chhunzawm zel a nih tur thu a sawi.
Hemi rual hian hri leng hluar zualna hmun tih lohah chuan, nitina inhlawhfate harsatna sutkianna turin April 20 aṭangin khuahkhirhna ṭhenkhat erawh thlahdul a nih tur thu a sawi bawk.
"April 20 hma chuan police station, district leh state tinah lockdown hi mipuiten an zawm ṭha em tih uluk taka thlithlai reng a ni ang," a ti. Hemi hnu hian hlawhtling taka kalpui a nih chuan khuahkhirhna ṭhenkhat thlah dul dan tur hi an ngaihtuah dawn tih a sawi a ni.
India chuan damdawi leh ei tur chhekkhawl a ngah tawk tih sawiin, PM chuan supply chain lama harsatna awm ṭhin pawh ngaihtuah zel a nih thu a sawi. Health infrastructure lamah pawh hmasawnna chak taka kalpui mek a ni, a ti.
Sorkarin hri leng dona kawnga a hmalaknaah mipuiten hun harsa tak an hmachhawn tih pawh a hriatpui thu sawiin, India himna tura an inpekna avangin zahna a hlan tih a sawi. Mipuiten hri leng mek laka hnehna chan a nih theihna tura sorkar an puih theihna tur kawng pasarih a kawhhmuh nghal a, hengte hi zawm turin a ngen zui bawk.
PM-in mipuite zawm tura ngenna a siamte chu:-
1) Kum upa zawkte, a bikin harsatna neite duat taka enkawl turin.
2) Lockdown leh social distancing dante ṭha taka zawm a, home-made face cover leh mask hmang turin.
3) Ayush ministry-in taksain natna a do theihna tihchakna tura thurawn a pekte zawm turin. Tui lum leh kadha in fo turin a chah bawk.
4) Coronavirus darh zel tur venna kawnga an puih theih nan Aaroygua Setu application download turin
5) Theih ang anga mi harsa leh rethei chhungkuate pui turin
6) An mi chhawrte lakah khawngaihna lantir a, hnathawktu tumah ban lo turin
7) Coronafighter - doctor, police leh a tihfaina kawnga thawkte chunga zahna lantir turin
May 3 thleng domestic leh international flight titawp dawn
Union ministry of civil aviation chuan PM Modi-a'n lockdown pawhsei a nih thu a puan hnuah, domestic leh international flight zawng zawng pawh May 3 thleng tihtawp a ni dawn tih a puang zui ve nghal.
Union civil aviation minister Hardeep Puri chuan chhan ṭha tak vangin lockdown hi pawhsei nih thu sawiin, a zawh hnuah thlawhtheihnate service chhunzawm tir nghal a ni dawn tih a sawi. "Mi tam takin harsatna an tawh dante pawh kan hriatthiampui a, mahse khawngaih taka dawhthei taka lo nghak turin kan ngen a ni," a ti. Hetih lai hian cargo flight, medical evacuation flight leh special flight-te erawh lockdown chhung hian an service chhunzawm dawn thung a ni.