Congress-in thupha chawi turin Parrikar phût

Congress Party chuan Defence Minister Manohar Parrikar chu Congress sorkar hunlaia surgical strike neih chungchang thu dik lo nia a sawi avangin thupha chawi turin an phut. Minister chu mipui≠te rilru hruaikawi tum leh, sipaite inpekna ngaihnep sakah an puh.

Congress sorkar lai, kum 1947, 1962, 1965 leh 1971 indo laia India sipaiten surgical strike an neihte kha an thlawp ṭha hle tih an sawi.

Defence Minister Parrikar hian kumin September thlaa Indian Army-te'n Pakistan ram china surgical strike an neih bakah chu, tun hma lamin surgical strike neih a la ni ngai lo niin a sawi a ni. Hei hi Congress Party chuan chhang letin, "Kum 2011-a Operation Ginger pawh kha surgical strike pui tham tak a ni. Eng vangin nge Manohar Parrikar hian sipaite inpekna chungchang hi a haider tlat? He thil hi politics khelhna tur chi a ni lo" tiin Congress communication hotu Randeed Singh Surjewala chuan a sawi.

Tun hmain surgical strike an la nei ngai lo tia Parrikara'n a sawi chu sipai hmusitna leh ram tana an inpeknate ngaihnep sakna a ni tiin, armed force hnenah ngaihdam dil nghal tura an phut thu Surjewala chuan a sawi. BJP president Amit Shah-a'n kum 68 chhunga Indian Army-te'n hmelmate bei tura LoC an paltlang ṭum khatna tia a sawi pawh thil hrechiang loah Congress chuan an puh bawk.