Pakistan High Commissioner-in surgical strike a la pha

India rama Pakistan High Commissioner Abdul Basit chuan Indian Army-te'n Pakistan ram chhungah firfiakte tawmbuk beia surgical strike an nei nia sawi chu thu dik lo a ni, a ti.

India Today-in a kawmnaah, Abdul Basit chuan Pakistan chuan India nena inzawmna ṭha tak nei a duh tih a sawi a, tunhnaia India sipaite chet dan chu surgical strike ni loin, ramri-a inkahna thleng zawk a ni tiin a sawi. Pakistan police official pakhatin surgical strike a thleng ngei tih a sawina video tihchhuah pawh chu siamchawp niin a sawi bawk. Surgical strike a thleng ngei tih finfiahna tur hian thil tam tak siamchawp theih vek a ni, a ti.

"Surgical strike hi thleng tak tak ni se, Pakistan hian a chhang let ngei ang", tiin Basit chuan a sawi.

Pakistan chuan ram dang nena boruak ṭha lo neih a duh lo a, remna a duh ber a ni, a ti. Mumbai beitu Pakistan firfiakte thubuai ngaihtuah tihkhawtlai a nih chungchangah, India thawhpuina tello chuan hei hi chinfel mai theih a ni lo tih a sawi bawk.

India leh Pakistan inkar boruak chu ṭha lo mah se, Pathankot airbase beih chungchang pawh ngawrh taka an chhui mek thu a sawi. Kum hnih kalta aṭang khan Pakistan chuan ram pahniht inkar boruak ṭha lo te siamṭhat tumin India chu inbiakna neihpui a tum reng a, mahse India chu Jammu and Kashmir chungchang sawidun turin a la inpeih lo a ni, a ti.