Ramchhung Lawrkhawm

Kum tlinglo hnenah vaihlo hralhtu kum sarih tan tir theih

Rajasthan-ah chuan Juvenile Justice Act hnuaiah state chhunga kum tling lo naupang hnenah vaihlo leh vaihlo aṭanga thilsiam leh ruihtheih thil dang hralh leh petu chu kum sarih lungin tan leh cheng nuai khat thleng chawitir theih a ni.

Director General of Police Manoj Bhatt chuan police station tinah police officer pakhat chu child welfare officer anga dah a ni dawn tih a sawi bawk. Juvenile Justice Act hi khauh taka kenkawh a ni dawn tih sawiin, hei hi vaihloin mihringa natna ṭha lo a thlen ṭhin laka veng tura hmalakna pawimawh tak pakhat a ni, a ti.

Kamov chopper siam turin inremna ziak dawn

India leh Russia chuan India ram chhunga Kamov 226T helicopter 200 siamna turin inremna ziah thuai an tum.

Kamov helicopter siamna atan hian US dollar tluklehdingawn khat vel a ngai dawn a, heng helicopter-te hi Cheetah leh Chetak chopper thlakna atan hman a ni ang. Inremna hi October 13-16-a Goa-a 2016 BRICS Summit neih chhungin Prime Minister Narendra Modi leh Russia President Vladimir Putin-te-n an ziahfel hman beisei a ni. Kamov chopper hian paratrooper pasarih a phur thei a, darkar khatah km 220-a chakin a thlawk thei a, kg 3,600 chin a phur thei bawk.

AAP MLA-21 te Oct 17 thleng hun pe

Election Commission of India (ECI) chuan Delhi-a rorellai, Aam Aadmi Party (AAP) MLA 21-te chu assembly member an nihna aṭanga paih an nih lohna chhan sawifiah turin October 17 thleng hun a pe.

MLA 21-te hi Parliamentary Secretary atana ruat an ni a, hei vang hian MLA ni chunga sum lakluhna dang, office of profit chelha puhin an lakah petition thehluh a ni a, MLA an nihna aṭang ban tura phut an ni. Delhi High Court chuan September thla khan parliamentary secretary atana ruat an nihna hi a lo hnawlsak tawh a ni. AAP chuan parliamentary secretary atana ruat an nih vang hian MLA-te hian hamṭhatna dang engmah an dawn belh lo niin a sawi.