India-in sum hmangin Maldives puihna pe leh

India chuan Maldive ram puihna turin USD mtd 50 treasury bill(T-Bill) chu kum khat chhung atan a pe chhuak thar leh. Sum hmanga puihna hi Maldive sorkarin economy ngelnghet a neih theihna tur atana India nena inremna an neih sa kal mek hnuaiah pek a ni.

Maldive sorkarin a ngen angin, State Bank of India (SBI) chuan kum khat chhung atan Ministry of Finance, Maldive hnenah Government Treasury Bill a pe chhuak leh tih Indian High Commission, Maldive chuan nimin Thawhṭanni khan thuchhuah siamin a tarlang. India sorkar chuan kum 2019 March aṭang tawh khan Maldive sorkar hnenah hian SBI aṭanga Treasury Bill pek chhuah hmangin kum tin pung awm loin a lo pui tawh ṭhin niin an tarlang.

He puihna pawhsei hi sorkar leh sorkar hnuaia inremna siam niin, rikrum thila Maldive ram sum hmanga puihna tur atana ruahman a ni. India-in Maldives a puihna hi ram pahnih inṭhianṭhatna ti langtu leh ṭhenawm ṭha nihna 'Neighbourhood First' policy bakah MAHASAGAR Mutual and Holistic Advancement for Security and Growth Across Regions tih hlawhtlinna a nih thu thuchhuahah an tarlang a ni.

India-in a puihna a pawhsei leh hnu hian Maldives minister of foreign affairs Abdulla Khaleel chuan India sorkar leh external affairs minister S. Jaishankar hnenah lawmthu a sawi nghal bawk.