Vawiinah BRICS Summit ṭan dawn

Brazil, Russia, India, China and South Africa (BRICS) Summit vawi riatna chu vawiin hian Goa-ah ṭan a ni dawn a, naktukah neih chhunzawm a ni ang.

Summit hi Prime Minister Narendra Modi-a'n a kaihruai dawn a, tun hnaia Pakistan firfiakten pawikhawihna an thlen hrang hrangte a sawichhuah ngei rin a ni. Summit-ah hian palaite chuan firfiak thlawptu leh humtu, sum hmanga lo puitu ramte enhran an duh thu pawh an puan ngei rin a ni bawk.

PM Modi chuan India-in BRICS Summit a thleng chu lawmawm a tih thu a sawi a, member ram mipuite inkara inthlunzawmna ṭha siam chu an duh tih a sawi. Modi chuan, "Kumina BRICS Summit-a chair kan nih angin, India chuan trade, sports, education, film, scholarship leh tourism lamahte mipuite inzawmna ṭha zawk siam a duh a ni", a ti. Summit-ah hian hmalakna thar turte pawh duan a ni dawn tih sawiin, Summit neih tawhnaa hlawhtlinna hmuh hrang hrangte pawh sawi lan a ni ang, a ti.

Khawvel huapa BRICS ramte pawimawh zia sawiin, Modi chuan member-te hian kawng hrang hrangah hmasawnna nasa zawk thlen tura an thawhho zel a beisei tih a sawi. "BRICS hi khawvel mipui hmun thuma ṭhena hmun hnih dawn awmna a ni a, kan thawhhona te tilian a, nghawng ropui tak a thlen kan beisei a ni. India chuan thawhhona thar leh ṭha zawk siam a duh a, kan inkara inhriatthiam lohna awmte chinfel a duh a ni", tiin a sawi.

Summit denchhen hian PM Modi leh Russia President Vladimir Putin-te chuan Goa-ah meeting an nei dawn a, he hunah hian dollar tam tak hu, defence lama thawhdunna tura inremna an ziah beisei a ni.