Ramchhung Lawrkhawm

PM-in war memorial a hawng

Prime Minister Narendra Modi chuan nimin khan Bhopal, Madhya Pradesh-ah sipai martar-te hriatrengna, Shaurya Samarak a hawng.

Shaurya Samarak hi Madhya Pradesh state sorkarin ram tana nunna hlantu, sipai-te hriatrengna atana a buatsaih a ni. Arera Hill-a ram acre 12-a zauah cheng vaibelchhe 41 sengin a siam a ni. War memorial-ah hian feet 62-a sang Shaurya Stambh dah a ni a, mi 1,000 ṭhut theihna amphitheatre bakah armed force-te chanchin leh India-in indona a hmachhawn tawh tarlanna gallery siam a ni bawk. Kum 2010, February 24 khan war memorial sakna tur lungphum hi hetih hunlaia sipai hotu lu, General Deepak Kapoor chuan a lo phum tawh a ni.

Mi tam tak thih chhanah LeT puh

Pakistan firfiak pawl, Mumbai khawpui beihnaa mawhphurtu Lashkar-e-Taiba chu pawisawi lo tam tak thihna thlenah US chuan a puh.

LeT hi UN-in terrorist organization zingah a telh a, US pawhin LeT leh an hotu Hafiz Saeed chu a black list-ah a telh bawk. US State Department thupuangtu Mark Toner chuan LeT hi civil mi pawisawilo tam tak thihna thlentu an ni a, an kut tuara thi zingah America pawh mi eng emaw zat an tel a ni, a ti. Kum 2008-a Pakistan firfiakten Mumbai khawpui an beihnaah khan LeT leh a hotu, Saeed-te hi a mawhphurtuah puh an ni. Mumbai khawpui an beihnaah hian mi 166 an thi a, midang 300 chuangin hliam an tuar a ni.

CISF kutah airport ven hna dah vek dawn

Home Ministry leh Civil Aviation Ministry chuan ramchhunga airport zawng zawnga venhim hna chu Central Industrial Security Force (CISF) kutah hlan tum a ni tih a sawi.

CISF hian ramchhunga airport 98 zinga 59-ah venhim hna an kalpui mek a, a dangte pawh hi a tahtawlin ventir an ni dawn a ni. He thutlukna hi Ningani-a Union Home Minister Rajnath Singh hoa airport security review meeting neihah siam a ni a, he meeting-ah hian civil aviation minister Ashok Gajapathi Raju bakah MoS (home) Kiren Rijiju leh Hansraj Ahir, MoS(civil aviation) Jayant Sinah, home leh civil aviation secretary, CISF DG OP Singh, Director General of Civil Aviation (DGCA) leh Bureau of Civil Aviation Security (BCAS) hotute an tel.