Ramchung Lawrkhawm

Kashmir-ah nawrh huaihawtten Pakistan leh China flag vai

Jammu and Kashmir-a tualchhung buaina kal zelah, nimin khan Baramulla-a nawrh huaihawtten Pakistan leh China flag an vai.

Baramulla-ah ṭawngṭaina hun an hman zawh hnuin, mipui lungawi lote chu awmkhawmin ram dang flag-te hi an vai ta a ni. Pungkhawm zinga ṭhenkhat chu China puihna dilin an au bawk. Kashmir-a buaina chhuakah hian lungawi lo ṭhenkhatten Pakistan flag hi an lo vai tawh
ṭhin a, mahse China flag erawh chu tun hma lamin an la vai lang ngai lo a ni. Pungkhawmte hian police-te chu lungin an tawng zui a, police-te chuan tear gas hmangin an hnawtdarh a ni.

Donald Trump-a'n
PM Modi a fak

US Republican president candidate, Donald Trump chuan Prime Minister Narendra Modi leh a policy-te a fak a, Modi chu mi ropui tak a ni, a ti.

Republican Hindu Coliation-in charity event a buatsaihah Indian-American pungkhawmte hmaa thu a sawiah, Trump chuan India chu khawvela democracy ram lian ber leh US ṭhianṭha tak a nih thu a sawi a, US President atana thlan tlin a nih chuan ram pahnihte in-
ṭhianṭhatna chu a hma aia a ṭhat zawk tur thu a sawi bawk.

Trump chuan Hindu leh India ngaisangtu a nih thu a sawi a, India ramah ṭhian ṭha tak tak a neih thu leh, zin fo pawh a chak thu a sawi. PM Modi chu India tana hmasawnna duhtu a ni a, tax code te siamṭhain, chhiah lak a titlem a, India economy chu kum khatah 7% in a
ṭhang a, hei hi thil ropui tak a ni, a ti.

Siliguri-ah rul tur Rs vbch 200 man man

West Bengal-a Siliguri-ah kar kalta Zirtawpni khan rul, cobra tur tam tham tak an man a, an thil man hi international black market-ah cheng vaibelchhe 200 man a ni. Tur neitu mi pali-te chu man an ni bawk.

Cobra tur hi Belgium siam, bullet proof bur panga-ah an dah a, forest official-te chu lei duh anga inchhalin a kawltute awmna hotel-ah an kal a, an mansak ta a ni. Rul tur an man hi France ram aṭanga lak, Bangladesh kaltlanga India rama lakluh nia sawi a ni. Rul tur hi China rama thawn tum nia sawi a ni.