Hripui leng vangin sorkar laipuiin Vehicular document validity a pawtsei

Union ministry of road transport and highways (MoRTH) chuan nimin khan thuchhuah siamin, ram chhunga Covid-19 hripui leng mek avangin vehicular document - Driving Licence (DL), Registration Certificate (RC) leh permit dangte dam chin, validity chu nakkum March 31 thleng atan a pawtsei. 

Ministry chuan document validity pawhsei a nih chungchang hi state leh Union Territory thuneitute pawh hriattir nghal a nih thu a sawi. 

Thuchhuah a siamah ministry chuan, "Covid-19 darh tur venna kawng khat atan, document tarlan takte validity chu nakkum March 31 thleng atan pawhsei a ni. Hei hian kum 2020, February 1 china an document validity zo emaw, nakkum March 31-a zo tur te emaw pawh a huam vek a ni," a ti. 

State leh UT hrang hranga enforcement authority hnenah, February 1, 2020 china vehicular document thite chu nakkum March 31 thlenga la hman theih, valid ang ngaihsak turin an ti a, hei hian document siam thar ngaite tan inhnawhkhawm ngai loa an tih theihna turin a pui thei dawn a ni, a ti. 

State leh Union Territory tinte chu he ruahmanna hi a taka kalpui vek turin ngenna thawn an ni a, hei hi mipui, motor khalhtu leh pawl hrang hrangte, hripui leng kara hna thawkten harsatna an tawh lohna tura ti an nih thu ministry chuan a sawi.