Cauvery inchuhna kal zelah TN-ah nawrh huaihawt

Karnataka leh Tamil Nadu state-te'n Cauvery lui tui an inchuhna kal zelah, nimin khan Tamil Nadu-a eptu pawlten rel kawng dangin nawrh an huaihawt.

DMK kaihhruaiin eptu party-te hian nimin aṭang khan state pumah darkar 48 awh nawrh huaihawtin rel kawng an dang a ni. Cauvery lui tui inchuh chungchangah sorkar laipui chu Tamil mite duh sak loha an puh a, Cauvery Management Board a din duh loh vangin sorkar laipui an dem thu an sawi bawk.

State chhunga eptu party hrang hrang leh Tamil Nadu loneitu pawlte chuan nawrh hi thlawpin, rel tlan tur an dang a, mahse nawrh huaihawt zinga eng emaw zat chu police-te'n an man. Police-te'n an man zingah hian VCK hotu, Thol Thurumavalanan pawh a tel.

Nawrh huaihawt vang hian rel station tinah police ṭhahnem tham tak duty tir an ni a, mahse hmun
ṭhenkhatah chuan DMK activist-te hi platform-ah an awm khat tlat a ni.

CPI hruaitu Mathuarasan chuan eptute thil phut chungchang chu sawiin, Tamil Nadu sorkar chu all party meeting ko tura an phut thu a sawi. DMK hruaitute hian Pathianni khan President Pranab Mukherjee hmuin, Cauvery lui tui insem dan chungchangah inrawlh turin an ngen a, memorandum an thehluh nghal bawk.

Hetihlai hian BJP state unit president Tamilisai Soundarrajan chuan nawrh huaihawt a ṭul loh thu sawiin, "Sorkar laipui chuan hemi chungchang hi a buaipui a, Tamil Nadu mipuite duhdan pawh a ngaih pawimawh sak dawn a ni", a ti.