Kashmir-ah helten tower guard-te silai chhuhsak

Jammu and Kashmir chhim lam, Anantnag district-a Dalvash khuaah Pathianni zan khan India aṭanga inlakkhran duh helhoin Doordarshan-a Low Power Transmitter station-a guard duty-te beiin, an rifle panga an chhuhsak.

Police-te chuan helho hian zan dar 12.30 velah Dalvash-a TV tower guard room chun luhchilhin, duty-te chu an bei a, helho hian sipai thawmhnaw an inbel niin an sawi. He thil thleng an hriat veleh police officer-te chu an kal nghal a, TV guard-te pawh hi an man a ni. Helho zawn hna hi an thawk nghal bawk.

Pathianni zan vek khan Pulwama district-ah helhohin police post an bei bawk. Mahse police-te hian lo kap letin, helhohi an tlanchhia a ni. September thla khan helho hian Kulgam district-a National Conference hotu, Abdul Rashid Khanday-a vengtu guard post an lo bei tawh bawk a, service rifle pali an la a ni.

Rajouri-a Tarkundi biala LoC-ah Pathianni zan khan 6 Rajput Regiment sipai, Sudesh Kumar chu kahhlum a ni. Hemi ni hian Pakistan sipaite chuan LoC-a inkahhai puan chu palzutin, Rajouri district-a Indian post-te an kap a ni. India sipaiten kap let venin, zing dar 8 thleng an inkap a, civil mi panga leh sipai pali-in hliam an tuar.