Panel hmaah surgical strike chungchang sawifiah dawn

Line of Actual control pela Pakistan ram chhunga India sipaiten surgical strike an neih chungchang chu vawiin hian sipai hotuten, Parliamentary Panel hmaah an hrilhfiah dawn.

Vawiina Parliamentary Standing Committee on External Affairs meeting neih turah hian Defence, External Affairs leh Home Secretary-te an tel dawn a, senior bureaucrat-te an tel bawk ang. Panel hian sipai hotute hi zawhna te pawh an zawt dawn nia sawi a ni.

Kar kalta Ningani khhan Defence ministry chuan meeting hi a lo ko tawh a, he hunah hian MP-te hmaah sipaite chet lak dan chu Vice Chief of Defence staff Lt Gen Bipin Rawat-a'n a hrilhfiah a, mahse MP-te hi sawifiah tura phut emaw, zawhna zawh emaw phalsak an ni lo.

Member 31 awmna, parliamentary panel-ah hian political party lian aiawhte an awm tel vek a, Congress vice president Rahul Gandhi pawh a tel. Committee chairman Sashi Tharoor chuan, "Dan panngaiah chuan member-te hi zawhna an zawh phalsak a ni
ṭhin. Hei hi thlak danglam kan tum lo a, mahse surgical strike neih chungchangah finfiahna pe tura phut kher kan tum lo. Kan sipaite hi kan ring tawk a ni" a ti. Member-te hian sawifiah tura an duh thilte chu senior bureaucrat-te hnenah an thlen thei dawn a ni.