Ramchung Lawrkhawm

Britain PM a rawn zin dawn

Britain Prime Minister Theresa May-i chu November 6-ah a rawn zin dawn a, November 8 thleng a cham ang. July thlaa Britain PM atana lakluh a nih hnua Europe pawn lama a zinchhuahna hmasa ber tur a ni. May-i hi sumdawng aiawhte eng emaw zatin an rawn zui dawn a ni.

A cham chhung hian Prime Minister Narendra Modi nen meeting an nei dawn a, ram pahnih hruaitute hian New Delhi-a tech summit an hawng dun bawk ang. May-i hi Britain secretaryof state for international trade, Liam Fox chuan a rawn ṭawiawm dawn a, an cham chhung hian ram pahnihten sumdawnna lama thawhdunna tur eng emaw zat an ziahfel beisei a ni bawk.

Innekbuaina thleng vangin ADM leh Magistrate suspend

Uttar Pradesh Chief Minister Akhilesh Yadav-a chuan Varanasi-a sakhaw hun pawimawh hmanga pawimawh hmanga mipuite punkhawmna hmuna innekbuaina thleng vanga mi 25 an thih hnuah, Varanasi Additional District Magistrate leh City Magistrate-te chu an mawhphurhna thlahthlamah puhin nimin khan a suspend.

Additional District Magistrate (ADM), City Vindhyavasini Raj leh City Magistrate B B Singh te suspend-na thupek hi nimin khan tihchhuah a nih thu sorkar thupuangtu chuan a sawi. Pathianni-a Varanasi-a Jai Gurudev-a zuitu pungkhawmten Rajghat lei an zawh laiin mipuite hi innekbuaiin mi 25 an chil hlum a, mi dang tam takin hliam an tuar. Thi zinga 20 hi hmeichhia an ni.

Ni ruk chhung Jaya-i dinhmun tarlang tawh lo

Chennai-a Apollo Hospital-a enkawl mek, Tamil Nadu Chief Minister J Jayalalithaa-i dinmun chu hospital lam chuan ni ruk chhung an tarlang tawh lo.

Hospital-in October 10 khan bulletin a tihchhuahah Jaya-i chu enkawlna hrang hrang a, respiratory support, antibiotics, nutrition, therapy leh physiotherapy te pek mek a nih thu a sawi. Damdawi-inah enkawl chhunzawm zel a ngaih thu a tarlang a ni. Hemi hnu hian CM hriselna dinhmun chungchang hi thu thar engmah a tarlang zui tawh rih lo a ni.