Bhubaneshwar hospital kangah mi 24 an thi

Odisha khawpui, Bhubaneshwar-a private hospital, S.U.M Hospital-ah Thawhṭanni zan khan kangmei nasa tak a chhuak. Kangmei chhuak avanga thi hi mi 24 an tling tawh a, mi dang 120 in hliam an tuar.

Kangmei hi zan dar 7.30 velah dialysis ward aṭanga chhuak nia hriat a ni a, a bula ICU chu a mankai nghal a, electric kalsual vanga chhuak nia sawi a ni. Kangṭhelh pawlte kal nghal vatin, zan dar 10.15-ah kangmei chhuak hi an ṭhelh mit thei a ni. Hospital hi chhawng li-a sang a ni a, kangmei chhuahna hi a chhawng khatna a ni.

S.U.M Hospital-a damlo enkawl laite chu Bhubaneshwar leh Cuttack-a hospital hrang hrangah sawn nghal an ni. Hospital thupuangtu Dr JR Das chuan, kangmei chhuak chu tihpalh thila chhuak a ni tih sawiin, hospital chuan thi chhungte leh hliam tuar na zual, damdawi-in danga sawn takte chu zangnadawmna pek a tum tih a sawi. Vanduaina thlen dan chu hospital chuan a chhui chiang dawn tih a sawi a, hnathawktu pathum chu suspend nghal an nih thu a sawi.

Chief Minister Naveen Patnaik chuan, damlote hi a tlawh tawh a, kangmei chhuak avanga inhliamte enkawlna chu state sorkarin CM relief fund aṭangin a tumsak dawn tih a sawi. CM chuan kangmei chhuah dan chu, Revenue Divisional Commissioner (RDC) kaihruainaa chhui chiang nghal turin thupek a tichhuak.

State Health Minister Atanu Sabyasachi Nayak chuan, kangmei chhuah chhan hi uluk taka chhui chian a ni dawn tih a sawi a, hemi rual hian damlo enkawl lai, damdawi-in hrang hranga sawn darhte ṭha taka enkawl chhunzawm an nih theihna tur chu, ngai pawimawh ber a nih thu a sawi.

Union Health Minister JP Nadda chuan chhiatna an tawh chungchangah sorkar laipui chuan Odisha sorkar chu a theih anga a puih tur thu a sawi. Prime Minister Narendra Modi pawhin hospital-a vanduain thleng pawi a tih thu leh, thi te a tawrhpui thu a sawi a, Nadda hnenah hliam tuarte chu AIIMS-ah sawn tura ruahmanna siam turin a hrilh a, ṭha taka an dam chhoh leh ngei a beisei thu a sawi bawk.