Ramchhung lawrkhawm

Algeria-ah Vice President Ansari a zin

Vice President Hamid Ansari chuan ni hnih cham turin Thawhṭanni zan khan Algeria ram a thleng. A cham chhung hian ram hruaitute kawmin, ram pahnihte thawhdunna chungchang a sawipui ang.

Ansari hian Algeria President Abdelaziz Bouteflika, Prime Minister Abdelmalek Sella leh hruaitu dangte meeting a neihpui dawn a ni. Algeria President Bouteflika hi kum 2001 khan Republic Day lawmnaah khuallian a lo ni tawh a ni. Ram pahnihte insumdawn tawnna hi dollar tluklehdingawn 1.5 a ni.

NIT admission-ah 75% cut-off hmang dawn

National Institutes of Technology (NIT)-a luh tumte chu JEE (Mains)-ah ti ṭha mah se, Class-12 examination-ah 75% an hmuh phak loh chuan admission an ti thei tawh dawn lo. Scheduled Castes leh Scheduled Tribes candidate-te tan bil cut off hi 70% a tihniam a ni ang.

Ministry of Human Resource Development (MHRD) chuan NIT-a admission criteria siam tha tur hian Central Seat Allocation Board (CSAB) hnenah a thlen a, CSAS chuan thutlukna a lo siam dawn a ni. Ramchhunga NIT 31 awmah hian kumtin zirlai 18,000 vel lak thar an ni ṭhin. Tuna kalpui danah chuan NIT-a admission ti turte tan hian general candidate tan 70% leh SC leh ST tan 65% cut off hman a ni. JEE Mains hi kumtin zirlai nuai 12-13 velin an exam ṭhin a, an zinga nuai hnih chu JEE Advanced pe thei turin an tling ṭhin.

Suu Kyi leh Sonia Gandhi inkawm

BRICS Summit hmanga India rama rawn zin, Myanmar State Councellor leh Foreign Minister Aung San Suu Kyi-i chuan Thawhṭanni khan Congress President, Sonia Gandhi chu New Delhi-a a chenna inah a kawm.

Hruaitu pahnihte hi minute 45 chhung an inkawm a, India leh Myanmar thawhdunna nghet zawk neih dan turte an sawidun. An inkawmnaah hian Congress hruaitu hlun Karan Singh pawh a tel ve a ni. Suu Kyi-i hian nimin khan President Pranab Mukherjee a hmu a, vawiin hian Prime Minister Narandra Modi a hmu leh ang. New Delhi-a business event-ah a tel dawn bawk a, India rama sumdawng liante nen an inkawm a ni.