SUM Hospital official pali man

Odisha khawpui, Bhubhaneshwar-a Thawhṭanni zana kangmei chhuak vanga mi 20 chuang an thih hnuah, SUM Hospital official pali chu man a ni. Kangmei chhuak vang hian mi 120 in hliam an tuar bawk.

Union Health Minister JP Nadd chuan nimin khan SUM Hospital hi a tlawh a, hliam tuar enkawl mekna AIIMS, Bhubaneshwar pawh tlawhin, tlai lamah Delhi lamah a kir leh nghal a ni.

Khandagiri police-te chuan hospital-a chhiatna thleng vang hian hospital official pali - Superintendent of Sum Hospital, Pushpraj Samantsinghar, Electrical Maintenance Engineer Amulya Sahu, Fire Safety Officer Santosh Das leh Junior Electrical Engineer Malay Sahu-te an man. Commissioner of Police YB Khurania chuan fire officer inquiry report leh Fire Services department-in Khandagiri police station-a FIR an thehluh behchhanin official-te hi man an nih thu a sawi. An pali hian IPC section hrang hrang hnuaiah thubuai siamsak an ni. Hospital-a thawktu mi pali chu suspend an ni bawk.

Director General of Fire Service, Binay Behera pawhin state sorkar hnenah private hospital-a kangmei chhuah dan chungchang a chhuina reprot a thehlut tawh bawk. Behera chuan hospital thuneitute hian fire safety norm, 2013 guideline siamte chu an zawm lo niin a sawi. Odisha-a hospital 568 awm zingah pathum chauhin department of fire safety
aṭangin clearance an nei .

Hospital-a kangmei chhuak vanga thi zinga a tam ber hi boruak tlachham leh meikhu hip nasat avanga thi an ni a, kangmei chhuahna ICU-a awm≠te chu a tam ber chu khawl hmanga thawktir ngaite an ni.

Institute of Medical Sciences leh Sum Hospital enkawltu, Siksha 'O' Anusandhan University (SOU) chuan kangmei chhuak vanga thi chhungte chu cheng nuai nga ṭheuh an pek tur thu a sawi. SOU vice-chancellor Amit Banerjee chuan kangmei chhuahna, ICU leh dialysis unit pawh enfiah turin khar rih a nih thu a sawi.

Thawhṭanni zana kangmei chhuak hi electric kalsual vanga chhuak nia hriat a ni a, chhawngli-a sang, SUM Hospital-a chhawng hnuai ber, dialysis ward aṭanga chhuak ṭan niin, a bula ICU chu a mankai a ni. Hospital-a dam lo enkawl laite chu hmun dangah sawnchhuah vek an ni.

National Human Rights Commission chuan Odisha state sorkar hnenah hriattirna pein, hospital-a chhiatna thlen dan chungchang report chu kar ruk chhunga thehlut turin a hrilh a, thi chhungte leh hliam tuarte zangnadawmna leh chhawmdawlna pek an nih dante hriattir turin a ti bawk. NHRC chuan hospital thuneituten fire safety clearance nei loa hospital tam tak din an phalsak chu mak a tih thu a sawi.