Ramchhung lawrkhawm

Avian flu vangin National Zoological Park khar

New Delhi-a National Zoological Park-a sava pakua thi zinga arva pul hri, avian flu vanga thi an awm tih hmuhchhuah a nih hnuah, hri hi a darh zel tur vennan zoo hi khar lailawk a ni.

Zoo PRO Riyaz Khan chuan, kar kalta Zirtawpni leh Inrinni-a thi, sava pakuate sample chu Jalandhar leh Bhopal-a an thawn hnuin avaiin flu vanga thi an awm tih hriatchhuah a ni thu a sawi a, mahse he hri vang hian sava thih belh an awm lo tih a sawi. Venthawn thilah ni eng emaw chhung chu Zoological Park hi khar a ni rih dawn a, zoo chhung hi enfiah a, a him tawk tih puan a nih hnuah chauh hawn a ni ang.

Uttarakhand-ah IAF chopper a tla

Indian Air Force thlawhtheihna, Mi-17 helicopter chu nimin khan Uttarakhand-a Chamoli district chhunga Mana khaw bulaah a tla.

Helicopter-ah hian mi 15 an chuang a, thi an awm lo. An zinga ṭhenkhat chuan hliam na vak lo an tuar a ni. Police-te chuan helicopter hi Thastoli helipad-a a ṭum tur chu a khawl lam chian loh vangin a tla niin an sawi a, thlawhtheihna hi a chhe nual nia sawi a ni.

SC judge hlui Katju lakah petition thehlut

Supreme Court judge hlui, Justice Markandey Katju chuan a blog-ah bawngsa khap chungchang sawiselna thu a ziah vangin a lakah petition thehluh a ni a, court hian nimin khan hriattirna a pe.

Justice Katju hian nikum January thla aṭanga Maharashtra state-a bawng talh leh bawngsa ei leh zawrh khapna dan hman chungchang sawiselna a ziak lang fo.Nikum September thlaa Noida-a bawngsa kawla puh vanga kum 50 mi vuakhlum a nih hnuah phei chuan bawngsa khap chungchang hi a sawisel na zual a ni. Tunhnaiah a Facebook-a a thuziakah, Justice Katju chuan bawng talh leh bawngsa ei chungchang sawiseltute a tiang chuan vuak hrep a chak thute a ziak a ni. Hei vang hian Allahabad-a Additional Sessions Judge court-ah a lakah petition thehluh a ni a, ADJ chuan November 18-ah a insawifiahna thehlut turin a hriattir.