J&K sorkarin India dodala puh officer 12 ban

Jammu and Kashmir sorkar chuan sorkar officer 12-te chu India dodal zawnga cheah puhin a ban.

State sorkar chuan offier 12-te banna tur thupek hi Nilaini zan khan a tichhuak a, ban takte hi department hrang hranga mid-level officer te an ni. Official-te chuan state police-a Crime Investigation Department report behchhanin officer-te hi ban an nih thu an sawi. Ban zinga ṭhenkhat chu Public Safety Act (PSA) hnuaiah thubuai siamsak zui an ni bawk a, thiam loh chantir an nih chuan thla ruk chhung jain tlantir theih an ni ang.

July 8-a security force-te'n Hizbul Mujahideen firfiak, Burhan Wani an kahhlum vang khan Kashmir-ah tualchhung buaina nasa tak a chhuak zui a, mipui leh security force-te inkara buaina chhuak vang hian mi 90 chuang an thi a, mi 12,000 velin hliam an tuar bawk. Sorkar chuan tharum thawh a, lung leh hmanraw dang hmanga security force-te beitute hi Pakistan thlawp inlakhran duhtu pawlte an fuih ṭhin niin a sawi.

Tualchhung buaina chhuak tihreh tuma sorkarin ham a laknaah, mi 9,000 chuang chu boruak tichhe zawnga cheah puhin man an ni a, mi 450 chu PSA hnuaiah hren an ni bawk.

Jammu and Kashmir sorkar hian tun ṭum hi India dodal zawnga chea puha sorkar official a ban ṭum hnihna a ni. Kum 1990 khan officer panga chu ban an lo ni tawh a, an zingah hian hetihlaia Excise Department Deputy Commissioner Neem Akhtar pawh a tel a, Akhtar hi tunah chuan rorellai People's Demoractic Party minister pawimawh tak a ni tawh. Sorkar officer panga-te ban an nih vang hian Kashmir-a sorkar hnathawkte chuan thla thum chhung nawrh an huaihawt phah a ni.