SUM Hospital neitu man

Odisha khawpui, Bhubaneshwar-a kangmei chhuak vanga mi 20 an thih phahna, SUM Hospital neitu Manoj Naik chu man a ni.

Manoj Naik hi Odisha-a rorellai, Biju Janata Dal leh state health minister Atanu Sabyasachi nena inzawmna ṭha tak nei nia sawi a ni. Nimin khan Khandagiri Police Station-ah a inpe a, man zui nghal a ni.

Union Health Minister JP Nadda chuan Nilaini khan Bhubaneshwar hi a tlawh a, SUM Hospital chuan himna tura sorkarin safety norm a siamte a zawm lo tih sawiin, mawhphurtute chu hrem ngei an nih tur thu a sawi. Minister chuan, "Health department pawhin an buaipui tur thil a awm a ni. Hetiang chhiatna hi a thlen nawn tawh lohna turin state tinte hnenah hriattirna pawh tihchhuah leh a ni ang", a ti.

Kum 2013 khan kangmei chhuak thei laka a him leh him loh chungchangah hospital hi enfiah a lo ni tawh a, thuneitute hospital himna tura thlak danglam ngai an sawite chu tun thlengin an la thlak lo a ni. Mahse hospital lam chuan kar li kalta khan an hospital chu endik a nih leh niin an sawi thung.