Debit card maktaduai 3.2 block sak

ATM virus/malware infection vangin ramchhunga debit card maktaduai 3.2 vel chu venthawn thilah block sak an ni. Bank tam tak chuan an customer te chu debit card thlak tur emaw, security code thlak tur emawin an hriattir nghal.

Buaina inṭanna hi Hitachi Payments Services aṭangin a ni a, Hitachi hi ramchhunga ATM siamtu company zinga pakhat a ni. Virus-in a tihbuai ATM hian debit card hmangtute hi an details a lo puanzar sak vek nia sawi a ni. Bank hrang hrangte chuan customer-te tana fimkhurna tur thuchhuah an siam a, an card PIN thlak tur te, bank dang ATM hmang lo tur te, midang hnenah an PIN hriattir lo tur tein an ngen.

Debit card block zingah hian Visa leh MasterCard maktaduai 2.6 a awm a, RuPay nuai ruk a awm bawk. Card block saktu bank te chu State Bank of India, HDFC Bank, ICICI Bank, Yes Bank leh Axis Bank-te an ni.

State Bank of India chuan thuchhuah siamin, "SBI chuan venthawn thilah customer ṭhenkhat card chu a block sak a ni. Hei hi card neitute tan thil hlauhthawnawm a ni lo a, an card pawh hi an hman chhunzawm leh thei dawn a ni" a ti. Yes Bank pawhin an ATM hrang hrangte uluk taka an enfiah thu leh, thil khawih buai a awm an hmuh loh thu nimin khan a sawi.

SBI chuan card network provider-te hnenah debit card ṭhenkhat a him loh theih thu hi an hriattir tawh a, heng card-te hi venthawn thilah an thlak sak ṭan nghal bawk.

Ram pumah hian July thla thleng khan debit card hi maktaduai 697.2 a awm tawh a ni.