Ramchhung Lawrkhawm

Central panel-in no-fail policy tihtawp duh

Human Resources Development (HRD) ministry chuan school policy hman mek, pawl 8 thlenga fail awm lo a, pawl sawn tir zel an ni chu tihtawp a duh a, sorkar laipuiah hemi titawp tur hian rawtna a thehlut.

Central Advisory Board of Education (CABE) sub-committee chairman, Punjab education minister Daljit Singh Cheema chuan no-fail policy hi ennawn an duh thu sawiin, a hma anga pawl 5 leh pawl 8 ah exam buatsaih leh nise an duh thu a sawi. Hei bakah hian Right to Education Act-in no-detention policy a siam pawh chu naupang tam takin an hnufual phah niin an sawi bawk.

Sub-committee rawtna hi October 25-a CABE annual meeting neih hunah state hrang hranga school education leh higher education minister-te'n an sawiho ang.

Jaya-i'n hma a sawn zel

Tamil Nadu-a rorel lai, AIADMK chuan damdawi-ina enkawl mek, Chief Minister Jayalalithaa-i chuan hma a sawn zel a, in lamah a haw thei thuai dawn niin a sawi.

AIADMK thupuangtu CR Saraswathy chuan, "Amma (Jaya) chuan Apollo Hospital doctor leh specialist-te enkawlna hnuaiah hma a sawn chho zel a ni" tiin, a ṭhat chhuah thuai an beisei thu a sawi. Jaya-i enkawl tur hian London-a special doctor pakhat bakah, AIIMS, Delhi-a doctor pathum koh an ni. Party worker leh Jaya-i ngaisangtute chuan temple, biak-in leh mosque hrang hrangah a ṭhatchhuah thuai theih nan an ṭawngṭai reng a ni.

Congress hruaitu hlunin BJP zawm

Congress hruaitu hlun, Uttar Pradesh state Congress hotu hlui leh MLA Rita Bahuguna Joshi-i chuan BJP a zawm. Nimin khan BJP office-ah party presient Amit Shah leh hruaitu dangte nen press conference an nei nghal.

Joshi-i chuan Congress party-ah kum 24 a awm tawh a, mahse a beisei a pha tawh lo niin a sawi a, MLA a nihna aṭang pawhin a bang nghal tih a sawi bawk. Congress vice president Rahul Gandhi chu bei zui nghalin, mipuite chuan hruaitu atan an pawm lo niin a sawi a, surgical strike chungchanga a Congress party thu sawi duh dan chuan a ti lungawi lo hle tih a sawi bawk. Hetih lai hian Joshi hi Congress-in nakkuma inthlan neih tura CM candidate atana Sheila Dikshit dah a tum nia sawi avangin a lungawi lo nia sawi a ni bawk.