J&K-ah sorkar hnathawk pawlin nawrh huaihawt tum

Jammu and Kashmir sorkarin India dodal zawnga chea puha officer 12 a ban avangin, state chhunga sorkar hnathawk pawl, Employees Joint Action Committee chuan nawrh huaihawt an tum.

EJAC president Abdul Qayoom Wani chuan state sorkar chetdan chu a ti lutuk deuh nia an ngaih thu sawiin, officer 12-te banna thupek a siam chu a sut loh chuan nawrh huaihawt an tum tih a sawi. Hei bakah hian sorkar hnathawk ban takte chu 12 aiin an tam niin a sawi bawk.

State sorkar chuan a hnuaia thawk mi 12-te hi sorkar dodal zawnga chetnaah leh, lunga security force-te tawngtute zingah an tel tih a sawi thung. Ban zingah hian police mi leh sa an tel lo tih a sawi tel bawk.

Officer ban takte hi Education, Revenue, Food, leh Public Health Engineering department amite an ni. India lak aṭanga inlakhran duhtu pawl pawhin state sorkar thiltih dan chu an dem thu an sawi a, state mipuite chuan hnathawktu an ban takte chu an thlawp thu an sawi. Sorkar hnathawk zawng zawngte pawh an thawhpuite tana ding ngam tur hian an ngen bawk.

July 8-a firfiak Burhan Wani thah a nih avanga Kashmir-a tualchhung buaina thleng chuan ni 104 zet a awh tawh. Buaina chhuak vanga civil mi thi pawh mi 90 an chuang tawh a, mi sing chuangin hliam an tuar. Mipui thinrim leh security force-te inkara buaina chhuakah hian police pahnih an thi tawh bawk a ni.

Police-te chuan pawikhawihna leh tharum thawhnaa inhnamhnawih
ṭhalai 6,000 chuang zet an man tawh. Political activist leh inlakhran duhtu pawl hruaitu mi 400 vel chu Public Safety Act hnuaiah pawn chhuak thei loa hren an ni bawk.