JNU zirlaiten lungawi lohna lantir

Delhi-a Jawaharlal Nehru University (JNU) zirlaite chuan nimin khan Home Ministry office kawtah nawrh an huaihawt a, chin hriat loha awm mek JNU zirlai Najeeb Ahmed zawn hna chu thawk thuai turin an ngen.

Ahmed hi October 15 zana university hostel-a Akhil Bharatiya Vidyarthi Parishad (ABVP) member-te nena an intihbuai hnuah chin hriat lohin a awm zui a ni. JNU zirlaite chuan theih≠tawpin Ahmed hi an zawng a, a thlalakte an tarchhuak a ni.

Zirlaite hian an lung≠awi lohna lantirin Vice Chancellor M Jagadesh Kumar chu darkar 20 chhung a office chhuahsan thei loin an dang a, hemi hnu hian Home Ministry chuan Delhi Police hnenah Ahmed-a chungchang buaipuitu team din turin thupek a tichhuak a, Delhi Police-te chuan Special Investigation Team an din a ni.

Delhi Police-te hian chin hriat loha ni nga a awm hnuah, Ahmed-a chanchin emaw, a awmna chin emaw hrilh theih hnenah lawmman, Rs 50,000 pek a tiam thu an puang. Indial Penal Code Section 365 hnuaiah complaint ziahluh a ni bawk. Home Minister Rajnath Singh chuan Ahmed-a an zawn dan chungchang chu Delhi Police Commissioner Alok Kumar Verma hnenah a zawt tawh bawk.