Ramchhung Lawrkhawm

PM Modi-an cabinet meeting-ah mobile phone a khap

Prime Minister Narendra Modi chuan cabinet meeting neih laia mobile phone hman a khap.

Prime Minister Office chuan cabinet meeting thutlukna pawimawh tak te, policy siam chungchang te put chhuak tur venna atan he khapna hi hman a nih thu a sawi. Central Secretariat chuan hemi chungchangah hian hriattirna a tichhuak nghal a ni. Central Secretariat chuan private secretary-te zawng zawng hnenah, minister-te chu Cabinet meeting neihna hmunah mobile phone kenluh leh hman phal a nih loh thu hi chiang taka hrilhfiah turin a ti a ni.

EC-ah BJP zualko tum

Uttar Pradesh sorkar chuan state chhunga ration card siam tharah Chief Minister Akhilesh Yadav-a thlalak an dah a, hei hi duh loin BJP chuan CM thlalak hi paih vek a nih loh chuan Election Commission-ah zualko a tum. Ration card thar hi Nilaini khan semchhuah a ni.

Uttar Pradesh-a BJP hotu, Keshav Prasad Maurya chuan state sorkar thiltih dan chu nakkuma assembly inthlan an neih tura mipuite vote hip tumna pakhat a ni tiin, miputie pawhin ration card-a CM thlalak dah chu an duh lo a ni, a ti. BJP bakah eptu party dang, Congress party pawhin ration card thar siam dan hi an sawisel bawk.

Delhi-ah bird flu darh

Delhi khawpuiah arva pul hri, bird flu hmuh a nih hnuin sava an thih belh leh.

New Delhi-a Zoo Park khar a nih hnuin, Deer Park pawh khar a ni ve leh a, thuneitute chuan sava thite chu khawih lo turin mipuite an ngen. Gwalior Zoo-ah pawh kanghlai 15 an thi tawh bawk. Official-te chuan Delhi Zoo leh Deer Park-te chu boruak a pangngai hunah hawn a ni dawn chauh tih an sawi a, Delhi ṭhenawm state, sava pem chi ten an pan ṭhinte pawh fimkhur turin an chah nghal bawk. Delhi sorkar chuan zoo chhunga sava te thih chhan zir chiang tur hian member 23 awmna committee a din a, department hrang hrang aiawhte an tel a, Development Commissioner Sandeep Kumar-a'n a ho a ni.