Lockdown hi hri leng do remna tur a ni lo : Rahul Gandhi
Congress hruaitu Rahul Gandhi chuan nimin khan video conference kaltlangin press mite a kawm a, sorkar laipuiin ram puma inkharkhipna, lockdown a puan mek chu hri leng mek do remna tur a ni lo a, hun rei lote atana hri darh chak tur venna chauh a ni, a ti.
Rahul Gandhi chuan hri leng dona kawnga chak zawka hma lakna tur chuan test a tam thei ang ber tih a ngai a ni tiin, sorkar laipui hnena a thurawn pawh a tam thei ang ber test neih a nih thu a sawi. "Tuna test kan neih zat hi a la tlem lutuk a ni. A thei anga tam test ti turin ka rawt a ni," a ti.
Hnathawk thei loa mi tam tak an awm avangin mi retheite chu chhawmdawlna sum pe turin sorkar a ngen a, hemi rual hian he lockdown puan hian sum lama a nghawng dan turah lo inbuatsaih lawk turin a chah bawk. Mipuite venhim an ngai a, ram economy a chhiat vek lohna tura hma lak a ngai bawk a ni, tiin Congress hruaitu chuan a sawi.
Prime minister Narendra Modi nen chuan thil tam takah ngaihdan in ang lo tak tak an nei fo a, mahse tuna ram chhunga hri leng mek do hneh tur chuan an bei let dun dawn tih a sawi. India chuan Covid-19 hi a hneh ngei dawn a ni tiin, hri leng do letna kawnga beitute zawng zawng an chhuang hle tih a sawi. Hri leng dona kawngah sipaite pawh thuam chak turin PM Modi chu a phut thu a sawi bawk.