China aṭangin damdawi hmanrua rawn thleng
Ministry of External Affairs (MEA) chuan nimin khan China aṭanga Covid-19 lak ata invenna tur damdawi hmanrua nuai 6.5 dawn a lo thleng tih a tarlang.
Hmanrua rawn thleng zingte Guangzhou Wondfo Biotech Co Ltd. siam Rapid Antibody testing kit nuai 3 , Livzon Pharmaceutical Group Inc. siam testing kit nuai 2.5 leh Shenzhen-a MGI aṭangin RNA Extraction kit nuai khat te a ni.
MEA hian foreign agency-te be kualin, India-in Covid-19 dona kawnga hmanrua a mamawhte dapin hna a thawk ṭhin a ni. MEA chuan South Korea, Singapore leh China aṭang hian test kit an chah thu a tarlang. Heng hmanruate hi India-a phur tur hian Beijing-a Indian embassy leh Guangzhou-a Indian embassay chuan hma an lak thu MEA chuan a tarlang.
Beijing-a Indian Ambassador Vikram Misri chuan India-ah ni 15 hnuah test kit maktaduai 2 chuang thawn leh kan tum mek a ni, a ti. Hri darh nasatna hmunah hian hri kai nia rinhlelhte chu rang taka enfiah hleih theih loh an nih avangin, Indian Council of Medical Research (ICMR) chuan rapid anti-body testing kit mamawh a nih thu April 2 khan an lo tarlang tawh a ni.
Heng rapid anti-body testing kit-te hi India a lo thlen tak avangin nikhatah a tam thei ang ber test hman an nih beisei a ni. ICMR tarlang dan chuan tunah hian ram 30-ah rapid anti-body kit chah mek a ni. A hmaa China aṭanga test kit India-a rawn lut chu a ṭhat tawk loh vangin hlui hlawn a lo awm nual tawh a ni.
ICMR tarlan dan chuan India-ah April 14 thleng khan mi 2,44,893-te chu test an ni tawh. Mithiamte chuan India ram chu mipui tamna ram a nih avangin hri an inkai darh zing zung loh nan leh hri veite a rang thei ang bera an hriat chhuah zung zung nan, hri beihna kawngah hian mipuite chu a tam thei ang ber test an ngai tih an sawi.