IIT Bombay leh Turkish University thawh dunna ti tawp ve leh

Indian Institute of Technology (IIT) Bombay chuan Inrini liamta khan, ramchhunga zirna in hrang hrang ten Turkey University te nena thawh hona an neihte an tih tawp hnuah an ti tawp ve leh. Hei hi India leh Pakistan inkar buaina chhuakah Turkey lamin Pakistan ṭan zawnga hmalakna a neih vang niin an tarlang.

Turkey hian Pakistan hi ralthuam leh hmanrua hmanga puiin, a ralthuam pekte chu India ramchhunga vantlang mipuite beihna atan hman a ni tih finfiah a nih hnuah India chuan Turkey a thlawpna hrang hrang te hi a ti tawp zui a ni.

IIT Bombay-in Turkey University nen a thawhdunna an neih te a tih tawp hma hian, Delhi-a Jawaharlal Nehru University (JNU) leh Jamia Millia Islamia chuan thawh dunna tur inremna an neih te chu an lo ti tawp tawh bawk. Turkey hian Pakistan lam an thlawp avang hian India chuan Azerbaijan tlawh tumte phalna a tih tawp sak tawh bawk a ni.

Turkey hian India aṭangin tlawhtu nuai thum chuang kum 2024 chhung khan a nei pha. Sumdawng pawl lian, Confederation of All India Traders (CAIT) chuan Turkey nena insum dawn tawnna an neih an ti tawp tawh bawk.