India leh Maldives-in thawh dunna tur MoU 13 ziak

India chuan Maldives nena thawh dunna thuk lehzual neihna turin, Pathianni liam ta khan Indian grant assistance scheme hnuaiah project 13 thawhna tur Memorandum of Understanding a ziahpui.

MoU ziah thar hi High Impact Community Development Project (HICDP) Phase III kalpuina tur niin Maldive tuipui huam chhunga in kalpawhna ṭha leh hnathawhtur pe thei tur niin Maldive Ministry of Foreign Affairs thuchhuah chuan a tarlang.

Ram pahnih ten project 13 thawh dunna tur MoU an ziah hi Maldivian Rufiyaa (MVR) mtd 100(Rs. 55,28,47,552) hu niin, Maldive-a lawng hmanga bungrua leh mihring phurhna tur, ferry service hmasawnna thlenna tur pawh a tel.

India leh Maldives ten project 13 thawhdun tur an ziahah hian Maldive sorkar aiawhin foreign affairs minister Abdulla Khaleel leh Maldives-a India High Commissioner G Balasubramanian ten an hming an ziak. Anni bakah hian implementing agency aiawhin transport and civil aviation minister Mohamed Ameen chuan a hming a ziak ve bawk.

MoU ziahna inkhawmah hian Khaleel chuan India-in a puihna te chuan nasa takin an ram tan malsawmna a thlen bakah Maldives mipuite mamawh nasa taka a phuhruk tur thu a sawi. Heng inremna an siamte hian infrastructure hmasawnna mai bakah, vantlang mipuite damkhaw chhuahna atan leh tualchhung mamawh hrang hrang a chhawk zangkhai theih dawn thu a sawi lang.