Bangladesh mi dan loa pem lut thlithlai tur din turin ti

Union Ministry of Home Affairs chuan ramchhunga state leh Union territory tinte chu district tinah Bangladesh mi leh Rohingya pem lutte chanchin kimchang thli thlai tur, Special Task Force(STF) chu ni 30 chhunga din vek tura hriattirna a ti chhuak.

April 22, 2025-a Pahalgam firfiak pawl beihna chhuak vanga mi 26 an thih hnuah, central agency hmalakna zulzuiin state tinte chu operation kalpui turin zalenna a lo pe tawh a ni. MHA thuchhuah chuan STF te chu Bangladesh mi leh Rohingya, dan loa pem lutte nihna kim chang, an chenna leh an chhungte thlenga chhinchhiah turin a tih bakah, chhinchhiahna siamsak an nih hnuah an awmna tur centre-ah dah turin a hriattir.

Ministry chuan dan loa pem lutte hi an nihna finfiah a nih hnuah, an nihna kimchang chu Foreigners' Identification Portal-ah dah lut turin a hriattir nghal. Dan loa pem lutte hi ni 30 chhunga tih fel hman tur a tih niin, tihfel hnu hian an rama thawn kir turin Border Security Force, Assam Rifles, emaw Indian Coast Guard emaw hnenah hlan mai theih tura ruahman a ni bawk.

MHA chuan India khua leh tui nihna nei anga inchhalte chu thlakhat chhunga finfiah tur in a ti a, he hmalakna te hi a hun taka thawnkir hna kal pui a nih theihna tur atana ruahman a nih thu official chuan an tarlang. Hei hi tun hnaia rampawn mi, firfiak pawl chetna inhnamhnawih an awm ṭhin ang a thlen nawn lohna tur atana hmalakna a ni.